Македонија се најде на 71. место (389 поени) при мерењето на јазичната писменост, односно само десет земји се зад нас на листата што денеска ја објави Организацијата за европска соработка и развој (ОЕЦД), а беше спроведена во 2022 година. Од 81 држава, во однос на резултатите по математика, македонските 15-годишници го освоиле 61 место (359 поени), додека по природни науки – со постигнати 380 поени, сме рангирани на 68. место. Од земјите во регионот, Хрватска и Србија котираат на првите 10 места.
Во април и мај минатата година беа опфатени 6610 ученици од 111 средни училишта, каде во зависност од големината, се тестираа од 35 до 155 ученици на македонски и албански јазик. Реализатор на студијата кај нас е Државниот испитен центар.
Со минимална разлика, резултатите за Македонија го задржуваат нивото кое беше измерено во 2018 година. Резултатите ќе бидат од исклучителна важност за ревидирање на постојните и креирање на идните образовни политики.
ПИСА е едно од најпознатите и најкредибилни меѓународни тестирања кое ја мери писменоста, односно применливото знаење што му е потребно на ученикот за да го продолжи своето образование и да успее во личниот и професионалниот живот. Задачите во тестовите се поврзани со реални ситуации во кои може да се најдат учениците и преку одговорите не се мери репродуктивното, туку функционалното знаење, кое е важно за поврзување, разбирање и решавање проблеми.
Општ заклучок е дека поради ковид-пандемијата, на светски рамки има опаѓање на успехот на учениците.
ПИСА тестирањето за прв пат кај нас се реализираше електронски, а ОЕЦД даде висока оценка која ја потврдува техничката подготвеност на Македонија и беспрекорноста на спроведувањето, што не е случај во 20% од земјите учеснички во кои не беше запазен барем еден од стандардите на изведување на тестирањето.
Ова е четврто наше учество на ПИСА, преку Министерството за образование и наука. Претходно бевме дел од студиите во 2000, 2015 и 2018 година
